அரக்கோணம் அருகே அ.இ.அ.தி.மு.க.வுக்கு ஆதரவாக தமிழக வாழ்வுரிமைக் கட்சித் தலைவர் திரு. வேல்முருகன், தேர்தல் பிரச்சாரம் மேற்கொண்டபோது, மர்மநபர்கள் கற்களை வீசி தாக்கியதில், அவருக்கு பின்னால் வந்த இரு வாகனங்கள் சேதமடைந்தன. 3 பேர் காயமடைந்தனர்.

நாடாளுமன்றத் தேர்தல் பிரச்சாரத்தில் நிறைவு நாளான நேற்று, தமிழக வாழ்வுரிமைக் கட்சித் தலைவர் திரு. வேல்முருகன், அரக்கோணம் மக்களவைத் தொகுதி அ.இ.அ.தி.மு.க. வேட்பாளர் திரு. கோ. அரியை ஆதரித்து, அரக்கோணம் பேருந்துநிலையம் பகுதியில் பிரச்சாரம் மேற்கொண்டு வாக்கு சேகரித்தார். முன்னதாக இத்தேர்தல் பிரச்சாரத்திற்காக திரு. வேல்முருகன் சென்றபோது, அரக்கோணம் அருகே வேடல் பகுதியில் இருசக்கர வாகனத்தில் வந்த மர்ம நபர்கள், கற்களை வீசி தாக்கினர். அதில், திரு. வேல்முருகன் வாகனத்துக்கு பின்னால் வந்த இரு வாகனங்களின் கண்ணாடி உடைந்தது. 3 பேர் காயமடைந்தனர். தாக்குதலை நடத்திய நபர்கள் தப்பியோடிவிட்டதாகக் கூறப்படுகிறது. இந்த தாக்குதல் குறித்து அரக்கோணம் தாலுகா போலீசார் வழக்குப்பதிவு செய்து விசாரணை நடத்தி வருகின்றனர்.