ஜப்பானை வீழ்த்தி காலிறுதிக்குள் நுழைந்தது பெல்ஜியம் : மெக்ஸிகோவை வென்று காலிறுதிக்கு முன்னேறியது பிரசில் அணி
Jul 3 2018 1:21PM
எழுத்தின் அளவு:
அ +
அ -
அ
உலகக்கோப்பை கால்பந்து தொடரில் நேற்று நடைபெற்ற நாக்-அவுட் சுற்றுப் போட்டிகளில், பெல்ஜியம், பிரஸில் அணிகள் காலிறுதி சுற்றுக்கு முன்னேறியுள்ளன.
ரஷ்யாவில் நடைபெற்றுவரும் உலகக் கோப்பை போட்டிகளில் நேற்று நடைபெற்ற நாக் அவுட் சுற்றின் இரண்டாவது ஆட்டத்தில், பெல்ஜியம் - ஜப்பான் அணிகள் பலப்பரீட்சை நடத்தின. ஆட்டத்தின் தொடக்கத்தில் இருந்தே இரு அணி வீரர்களும் சிறப்பாக விளையாடினர். முதல் பாதி நேரம் முடியும் வரை எந்த அணியும் கோல் அடிக்காததால், பெல்ஜியம் - ஜப்பான் அணிகள் 0-0 என சமனிலை வகித்தன. ஆட்டத்தின் இரண்டாவது பாதியில் ஜப்பான் அணி வீரர்கள் சிறப்பான ஆட்டத்தை வெளிப்படுத்தினர். இதனால் ஆட்டத்தின் 48-வது நிமிடத்தில் ஜப்பான் வீரர் ஜெங்கி ஹராகுசி ஒரு கோல் அடித்தார். மேலும், ஆட்டத்தின் 52 வது நிமிடத்தில் டகாஷி மேலும் ஒரு கோல் அடித்ததால், ஜப்பான் 2-0 என முன்னிலை பெற்றது. இதற்கு பதிலடி கொடுக்கும் விதமாக பெல்ஜியம் அணியின் ஜேன் வெர்டோகன் ஆட்டத்தின் 69-வது நிமிடத்தில் ஒரு கோல் அடித்தார். அதைத்தொடர்ந்து, 74 வது நிமிடத்தில் பெல்ஜியம் வீரர் மரானே பெலானி ஒரு கோல் அடித்தார். இதனால் இரு அணிகளும் 2-2 என்ற கோல் கணக்கில் சமனிலை வகித்தன. ஆட்ட நேர முடிவில் இரு அணிகளும் சமனிலை பெற்றதால் கூடுதல் நேரம் வழங்கப்பட்டது. இதை பயன்படுத்தி பெல்ஜியம் வீரர் நாசர் சடி 94-வது நிமிடத்தில் ஒரு கோல் அடித்து தனது அணியை வெற்றிக்கு அழைத்து சென்றார். ஜப்பானை 3-2 என்ற கோல் கணக்கில் வீழ்த்தி பெல்ஜியம் அணி காலிறுதிக்குள் நுழைந்தது.
முன்னதாக நேற்று நடைபெற்ற நாக்-அவுட் சுற்றின் முதல் ஆட்டத்தில், மெக்சிகோ - பிரஸில் அணிகள் மோதின. நட்சத்திர வீரர் நெய்மர் அங்கம் வகிக்கும் பிரஸில் அணி மீது ரசிகர்கள் மத்தியில் பலத்த எதிர்பார்ப்பு இருந்தது. ஆட்டத்தின் முதல் பாதியில் இரு அணிகளும் கோல் அடிக்கவில்லை. இதனை அடுத்து, இரண்டாம் பாதியின் 51-வது நிமிடத்தில் நெய்மர் அசத்தலாக கோல் அடித்து தனது அணியை முன்னிலைப்படுத்தினார். தொடர்ந்து, 90 வது நிமிடத்தில் பிரேஸில் அணியின் பிர்மிடோ மற்றொரு கோல் அடித்தார். ஆட்ட நேர முடிவில் பிரஸில் அணி 2-0 என்ற கணக்கில் மெக்சிகோவை வீழ்த்தி காலிறுதிக்கு முன்னேறியது.