ஃப்ரெஞ்ச் ஓபன் டென்னிஸ் போட்டி : ஆர்ஜென்டினா வீரரை தோற்கடித்ததன் மூலம் ரஃபேல் நடால், கிராண்ட்ஸ்லாம் போட்டிகளில் தனது 200-வது வெற்றியை பதிவு செய்துள்ளார்
May 27 2016 8:30AM
எழுத்தின் அளவு:
அ +
அ -
அ
ஃப்ரெஞ்ச் ஓபன் டென்னிஸ் போட்டியில் ஆர்ஜென்டினா வீரரை தோற்கடித்ததன் மூலம், ஸ்பெயினின் ரஃபேல் நடால், கிராண்ட்ஸ்லாம் போட்டிகளில், தனது 200-வது வெற்றியை பதிவு செய்துள்ளார்.
கிராண்ட் ஸ்லாம் போட்டிகளில் ஒன்றான ஃப்ரெஞ்ச் ஓபன் டென்னிஸ் போட்டிகள், ஃபிரான்ஸ் தலைநகர் பாரீசில் நடைபெற்று வருகின்றன. நேற்று நடைபெற்ற ஆடவர் ஒற்றையர் பிரிவு 2-வது சுற்று ஆட்டத்தில், 9 முறை சாம்பியன் பட்டம் வென்று சாதனை படைத்துள்ள ஸ்பெயினின் ரஃபேல் நடால், ஆர்ஜென்டினாவின் Facundo Bagnis-ஐ எதிர்கொண்டார். மிகவும் விறுவிறுப்பாக நடைபெற்ற இப்போட்டியில், 6-3, 6-0, 6-3 என்ற செட்கணக்கில் நடால் மிக எளிதாக வெற்றிபெற்று அடுத்த சுற்றுக்கு முன்னேறினார்.
இதன்மூலம், கிராண்ட் ஸ்லாம் போட்டிகளில் தனது 200-வது வெற்றியை ரஃபேல் நடால் பதிவு செய்துள்ளார். அத்துடன், கிராண்ட்ஸ்லாம் போட்டிகளில் ஆடவர் ஒற்றையர் பிரிவில் அதிக வெற்றிகளை குவித்த 8-வது வீரர் என்ற பெருமையையும் அவர் பெற்றுள்ளார். கிராண்ட் ஸ்லாம் போட்டிகளில் அதிக வெற்றிகளை குவித்த வீரர்கள் பட்டியலில், சுவிட்சர்லாந்தின் ரோஜர் ஃபெடரர் 302 வெற்றிகளுடன் முதலிடத்தில் உள்ளது குறிப்பிடத்தக்கது.