சீனாவில் நடைபெற்ற ஆசிய அளவில், பள்ளிகளுக்கு இடையிலான தடகளப் போட்டியில் பல்வேறு பதக்கங்களை வென்ற மாணவ-மாணவிகள் சென்னை திரும்பினர். விளையாட்டுத்துறைக்கு முதலமைச்சர் செல்வி ஜெயலலிதா அளித்து வரும் ஊக்கம் காரணமாகவே, தங்களால் வெளிநாடு சென்று பதக்கம் வெல்ல முடிந்ததாகவும், இதனால், முதலமைச்சருக்கு நன்றி தெரிவிப்பதாகவும் மாணவிகள் தெரிவித்தனர்.

முதலமைச்சர் செல்வி. ஜெ. ஜெயலலிதா, விளையாட்டுத் துறைக்கு அதிக அளவில் நிதி ஒதுக்கீடு செய்து, தமிழகத்தில் இருந்து ஏராளமான விளையாட்டு வீரர்-வீராங்கனைகளை உருவாக்க தீவிர நடவடிக்கை மேற்கொண்டு வருகிறார். முதலமைச்சரின் சிறப்பான நடவடிக்கைகளால் தமிழகத்தின் பல்வேறு பகுதிகளிலும் அரசு, மாநகராட்சிப் பள்ளி மாணவ-மாணவிகளுக்கு மாவட்ட விளையாட்டு மேம்பாட்டு ஆணையத்தால், பல்வேறு பயிற்சிகள் அளிக்கப்பட்டு வருகின்றன.

இந்நிலையில், சீனாவின் Wuhan நகரில், ஆசிய பள்ளிகளுக்கு இடையே நடைபெற்ற தடகளப் போட்டியில் தமிழகத்தைச் சேர்ந்த ஏராளமான மாணவ-மாணவிகள் தங்கம், வெள்ளி, வெண்கலப் பதக்கங்களை வென்று சாதனை படைத்துள்ளனர். சென்னையைச் சேர்ந்த தமிழ்ச்செல்வி 100 மீட்டர் ஓட்டப்பந்தயத்தில், வெள்ளிப் பதக்கமும், ப்ரியதர்ஷினி மும்முறை தாண்டும் போட்டியில் வெள்ளிப் பதக்கமும் வென்றனர். திருநெல்வேலியைச் சேர்ந்த மாணவி ராமலெட்சுமி, 200 மீட்டர் ஓட்டப்பந்தயத்தில் வெண்கலப்பதக்கம் வென்றார்.

முதலமைச்சர் செல்வி ஜெயலலிதா, உத்தரவுப்படி, மாவட்ட விளையாட்டு மேம்பாட்டு ஆணையத்தால் வழங்கப்பட்ட மிகச்சிறப்பான பயிற்சிகள் காரணமாகவே, தங்களால் இந்த வெற்றியைப் பெறமுடிந்தது என சீனாவிலிருந்து பதக்கங்களுடன் சென்னை திரும்பிய மாணவிகள் பெருமிதம் தெரிவித்தனர். தாங்கள் சீனா செல்ல நிதியுதவி வழங்கிய முதலமைச்சர் செல்வி ஜெயலலிதாவுக்கு மாணவிகள் தங்களது நெஞ்சார்ந்த நன்றியைத் தெரிவித்துக் கொண்டனர்.