கோடை சீசனை முன்னிட்டு உதகை படகு இல்லத்தில் ந​டைபெற்ற படகு போட்டிகளில் சுற்றுலாப் பயணிகள் ஆர்வத்துடன் பங்கேற்றனர்.

நீலகிரி மாவட்டம் உதகையில் தற்போது கோடை சீசன் களைகட்டியுள்ளது. இதனால் நாள்தோறும் ஏராளமான சுற்றுலா பயணிகள் வந்து செல்கின்றனர். அவ்வாறு வரும் சுற்றுலா பயணிகளுக்காக மாவட்ட நிர்வாகம் சார்பில் கோடைவிழா நடத்தப்பட்டு வருகிறது. அதன் ஒருபகுதியாக உதகையில் உள்ள படகு இல்லத்தில் தமிழக சுற்றுலா துறை சார்பாக படகு போட்டி நடத்தப்பட்டது. சுற்றுலா பயணிகளை உற்சாகபடுத்தும் வகையில் ஆண்கள், பெண்கள், தம்பதியினர், படகு இல்ல ஊழியர்கள் மற்றும் பத்திரிக்கையாளர்கள் என 5 பிரிவுகளாக போட்டிகள் நடத்தப்பட்டன. இந்த போட்டிகளை மாவட்ட சுற்றுலா அலுவலர் திரு. உமா சங்கர் கொடியசைத்து தொடங்கி வைத்தார். இதில் கலந்து கொண்ட சுற்றுலா பயணிகள் கடும்குளிரையும் பொருட்படுத்தாமல் ஆர்வத்துடன் பங்கேற்று வெற்றி பெற்றனர். வெற்றி பெற்றவர்களுக்கு பரிசுகள் வழங்கி பாராட்டு தெரிவிக்கப்பட்டது.