உலக கோப்பை 20 ஓவர் கிரிக்‍கெட் போட்டியில், 6 ரன்கள் வித்தியாசத்தில் பங்களாதேஷ் அணியை, ஸ்காட்லாந்து தோற்கடித்துள்ளது.

20 ஓவர் உலக கோப்பை கிரிக்கெட் தொடரின் முதல் சுற்று போட்டிகள் நேற்று தொடங்கின. இந்த சுற்றில் பங்கேற்றுள்ள 8 அணிகள் 2 பிரிவாக பிரிக்கப்பட்டு லீக் சுற்றில் மோதுகின்றன. அல் அமீரத் நகரில் நேற்று நடைபெற்ற ஆட்டத்தில் ஸ்காட்லாந்து, பங்களாதேஷ் அணிகள் மோதின. இதில் டாஸ் வென்ற பங்களாதேஷ் பீல்டிங்கைத் தேர்வு செய்தது. அதன்படி, முதலில் பேட் செய்த ஸ்காட்லாந்து அணி, 20 ஓவரில் 9 விக்கெட்டுக்கு 140 ரன்கள் எடுத்தது. அதிகபட்சமாக கிறிஸ் கிரீவ்ஸ் 45 ரன்கள் அடித்தார். பங்களாதேஷ் சார்பில் மஹதி ஹசன் 3 விக்கெட்டுகளை வீழ்த்தினார்.

இதையடுத்து 141 ரன்கள் எடுத்தால் வெற்றி என்ற இலக்குடன் களமிறங்கிய பங்களாதேஷ் அணி 7 விக்கெட் இழப்புக்கு 134 ரன்கள் மட்டுமே எடுத்தது. இதன்மூலம் ஸ்காட்லாந்து அணி 6 ரன்கள் வித்தியாசத்தில் வெற்றி பெற்றது. ஸ்காட்லாந்து சார்பில் பிராட்லி வீல் 3 விக்கெட்டுளை வீழ்த்தினார்.