உலக டென்னிஸ் தரவரிசை பட்டியல் வெளியீடு - அமெரிக்க ஓபன் பட்டம் வென்ற ஜப்பானின் நவோமி ஒசாகா - மூன்றாம் இடத்துக்கு முன்னேற்றம்
Sep 15 2020 12:34PM
எழுத்தின் அளவு:
அ +
அ -
அ
உலக டென்னிஸ் தரவரிசையில் அமெரிக்க ஓபன் பட்டத்தை வென்ற ஜப்பான் வீராங்கனை நவோமி ஒசாகா, 6 இடங்கள் முன்னேறி 3-வது இடத்தை பிடித்துள்ளார்.
அமெரிக்க ஓபன் டென்னிஸ் போட்டி முடிவடைந்ததைத் தொடர்ந்து புதிய தரவரிசை பட்டியலை சர்வதேச டென்னிஸ் சங்கம் வெளியிட்டுள்ளது. அதன்படி, ஆடவர் ஒற்றையர் பிரிவில் செர்பியாவின் ஜோகோவிச் தொடர்ந்து முதலிடத்தில் நீடிக்கிறார். 2-வது இடத்தில் ஸ்பெயினின் ரஃபேல் நடாலும், அமெரிக்க ஓபன் பட்டத்தை வென்ற ஆஸ்திரியாவின் டொமினிக் தீம் 3-ம் இடத்திலும் உள்ளனர்.
மகளிர் ஒற்றையர் பிரிவில் ஆஸ்திரேலிய வீராங்கனை ஆஷ்லி பார்ட்டி நம்பர் ஒன் இடத்திலும், ருமேனியா சிமோனா ஹாலெப் 2-வது இடத்திலும் தொடருகின்றனர். அமெரிக்க ஓபன் பட்டத்தை வென்ற ஜப்பான் வீராங்கனை நவோமி ஒசாகா, 6 இடங்கள் முன்னேறி 3-வது இடத்தை பிடித்துள்ளார். இறுதிப்போட்டியில் தோல்வி அடைந்த பெலாரஸ் வீராங்கனை விக்டோரியா அஸரென்கா, 13 இடங்கள் ஏற்றம் கண்டு 14-வது இடத்தை பெற்றுள்ளார். அரைஇறுதியில் தோல்வி கண்ட செரீனா வில்லியம்ஸ் ஒரு இடம் பின்தங்கி 9-வது இடத்திற்கு தள்ளப்பட்டுள்ளார். அரைஇறுதியில் தோற்ற அமெரிக்க வீராங்கனை ஜெனிபர் பிராடி, 16 இடங்கள் உயர்ந்து 25-வது இடத்தை பிடித்துள்ளார்.