சபரிமலையில், ஐயப்பனை தரிசிக்கச் சென்ற பெண் பக்‍தர்கள் இன்றும் தடுத்து நிறுத்தப்பட்டனர். அவர்கள் தர்ணா போராட்டத்தில் ஈடுபட்டதால் அங்கு மீண்டும் பரபரப்பு ஏற்பட்டது.

கேரளாவில் கடும் எதிர்ப்பையும் மீறி, பெண் பக்‍தர்கள் சபரிமலைக்‍கு செல்ல முயல்வதால், கடந்த ஒரு மாதத்திற்கும் மேலாக அங்கு 144 தடை உத்தரவு அமலில் இருந்து வருகிறது. சென்னை உள்ளிட்ட பல்வேறு இடங்களிலிருந்து நேற்று சபரிமலை வழிபாட்டுக்குச் சென்ற 50க்‍கும் மேற்பட்ட பெண் பக்தர்களை, போராட்டக்காரர்கள் பம்பையிலேயே தடுத்து நிறுத்தினர். அதனை மீறி சிலர் சன்னிதானம் நோக்‍கி செல்ல முயன்றதால், அங்கு பெரும் பரபரப்பு ஏற்பட்டது.

இன்று கேரளாவைச் சேர்ந்த 2 பெண் பக்‍தர்கள் சபரிமலைக்‍குச் சென்றனர். இதை முன்கூட்டியே தெரிந்துகொண்ட போராட்டக்‍காரர்கள் சபரிமலைக்‍கு 2 கிலோ மீட்டருக்‍கு முன்னதாகவே அப்பச்சிமேடு பகுதியில் அவர்களை தடுத்து நிறுத்தினர். இதனால் அங்கு சிறிதுநேரம் பரபரப்பு நிலவியது. இதை கருத்தில் கொண்டு அங்கு தொடர்ந்து காவல்துறையினர் குவிக்‍கப்பட்டுள்ளனர்.