திருப்பதி ஏழுமலையான் கோவிலில், இன்று ராமநவமி விழா நடைபெறுகிறது. ராமர் பட்டாபிஷேக விழா, நாளை நடைபெறுகிறது.

திருமலை திருப்பதி தேவஸ்தானம் வெளியிட்டுள்ள செய்திக் குறிப்பில், திருப்பதி ஏழுமலையான் கோவிலில், ராமநவமி விழா இன்று நடைபெற உள்ளதாக தெரிவிக்கப்பட்டுள்ளது. அதனையொட்டி, காலை 9 மணியில் இருந்து பகல் 11 மணிவரை, உற்சவர்களான சீதா, ராமர், லட்சுமணர், ஆஞ்சநேயருக்கு மஞ்சள், குங்குமம், சந்தனம், பால், தயிர், தேன், இளநீர் ஆகிய சுகந்த திரவியங்களால் ஸ்நாபன திருமஞ்சனம் செய்யப்படுகிறது.

அதனைத்தொடர்ந்து, இரவு 7 மணியில் இருந்து 9 மணி வரை அனுமன் வாகனத்தில் உற்சவர் மலையப்பசாமி எழுந்தருளி, கோவில் வளாகத்தில் உலா வந்து அருள்பாலிக்கிறார். இரவு 10 மணியில் இருந்து 11 மணி வரை, பங்காருவாகிலியில் ஆஸ்தானம், நாளை ராமர் பட்டாபிஷேக விழா நடைபெற உள்ளதாக அந்த செய்திக் குறிப்பில் தெரிவிக்கப்பட்டுள்ளது.

இதனிடையே, கொரோனா தொற்று காரணமாக பல மாநிலங்களில் பகுதி நேர ஊரடங்கு அமலில் உள்ளதால், தரிசனத்திற்கு வர முடியாமல் பக்தர்கள் சிரமத்திற்கு உள்ளாகி வருகின்றனர். எனவே, ஏப்ரல் 21 முதல் 30-ம் தேதி வரை தரிசன டிக்கெட் முன்பதிவு செய்த பக்தர்கள், கொரோனா தொற்று காரணமாக வரமுடியாத சூழ்நிலை ஏற்படும் நிலையில், அவர்கள் 90 நாட்களுக்குள் வந்து, ஏழுமலையானை தரிசனம் செய்து கொள்ளலாம் என தேவஸ்தானம் தெரிவித்துள்ளது.