ஐ.என்.எக்ஸ் மீடியா வழக்கில், திஹார் சிறையில் அடைக்‍கப்பட்டுள்ள ப.சிதம்பரத்திடம் 30 நிமிடங்கள் விசாரணை மேற்கொள்ளவும், தேவைப்பட்டால் கைது செய்துகொள்ளவும், அமலாக்‍கத்துறைக்‍கு டெல்லி சிறப்பு நீதிமன்றம் அனுமதி வழங்கியுள்ளது.

ஐ.என்.எக்ஸ். மீடியா சட்டவிரோதப் பணப்பரிமாற்ற வழக்கில், சி.பி.ஐ., அதிகாரிகள் ப.சிதம்பரத்தை கைது செய்ததை அடுத்து, அவர் நீதிமன்றக் காவலில், திஹார் சிறையில் அடைக்‍கப்பட்டுள்ளார். இவ்வழக்‍கில் அமலாக்‍கத்துறையும், தனியாக வழக்‍குப்பதிவு செய்துள்ளது. சிதம்பரத்தை கைது செய்து விசாரணை நடத்த வேண்டியிருப்பதால், அதற்கு அனுமதி அளிக்‍குமாறு, டெல்லி சி.பி.ஐ. சிறப்பு நீதிமன்றத்தில், அமலாக்‍கத்துறை மனுதாக்‍கல் செய்தது.

இந்த மனு மீது, டெல்லி சி.பி.ஐ. சிறப்பு நீதிமன்றத்தில், நீதிபதி திரு. Ajay Kumar Kuhar முன்னிலையில், நேற்று விசாரணை நடைபெற்றது. அப்போது, சிதம்பரத்தை கைது செய்து விசாரணை நடத்தவேண்டிய அவசியம் ஏற்பட்டுள்ளதாக அமலாக்‍கத்துறை தெரிவித்தது. இதற்கு சிதம்பரம் தரப்பில் கடும் ஆட்சேபம் தெரிவிக்‍கப்பட்டது. C.B.I. அதிகாரிகள் ஏற்கெனவே சிதம்பரத்தை கைது செய்து, சிறையில் அடைத்திருப்பதால், ஒரேமாதிரியான வழக்‍கில் இன்னொருமுறை அவரை கைது செய்யக்‍கூடாது என வலியுறுத்தக்‍கப்பட்டது.

இந்நிலையில், திஹார் சிறையில் அடைக்‍கப்பட்டுள்ள ப.சிதம்பரத்திடம் 30 நிமிடங்கள் விசாரணை மேற்கொள்ளவும், தேவைப்பட்டால் கைது செய்து கொள்ளவும், அமலாக்‍கத்துறைக்‍கு டெல்லி சிபிஐ சிறப்பு நீதிமன்றம் இன்று அனுமதி வழங்கியுள்ளது. இதையடுத்து, சிதம்பரத்தை நாளை கைது செய்ய, அமலாக்‍கத்துறை, திட்டமிட்டுள்ளதாக தகவல் வெளியாகிவுள்ளது.