விக்‍ரம் லேண்டருடன் தொடர்பை ஏற்படுத்தும் முயற்சியில் இஸ்ரோவுக்‍கு துணையாக அமெரிக்க விண்வெளி ஆய்வு நிறுவனமான நாசா களம் இறங்கி உள்ள நிலையில், விக்ரம் லேண்டரை நாசாவின் ஆர்பிட்டர் இன்று புகைப்படம் எடுத்து அனுப்பவுள்ளது.

நிலவின் தென் துருவத்தை ஆய்வு செய்வதற்காக விண்ணில் செலுத்தப்பட்ட சந்திரயான்-2 விண்கலத்தின் லேண்டர் கருவியான விக்‍ரம், கடந்த 7ம் தேதி, நிலவின் குறிப்பிட்ட இடத்தில் தடம் பதிக்‍க வேண்டிய இறுதி நேரத்தில், தகவல் தொடர்பை இழந்தது.

அதேநேரம், ஹாட் லேண்டிங் தொழில்நுட்ப முறையில் நிலவில் தரையிறங்கி உள்ள விக்‍ரம் லேண்டர், அசைவற்ற நிலையில் உள்ளது. அதனுடன் தொடர்பை ஏற்படுத்த இஸ்ரோ விஞ்ஞானிகள் தீவிர முயற்சி மேற்கொண்டு வருகின்றனர்.

லேண்டருடன் தொடர்பை ஏற்படுத்தும் முயற்சியில் இந்தியாவுக்கு துணையாக அமெரிக்க விண்வெளி ஆய்வு நிறுவனமான நாசா களமிறங்கி உள்ளது. ரேடியோ அதிர்வெண்கள் மூலம் விக்ரமை தொடர்பு கொள்ள நாசா முயற்சித்து வருகிறது. இஸ்ரோவின் ஒப்புதலுடன், Deep space network மூலம் விக்ரமை தொடர்பு கொள்ள முயற்சித்து வருவதாக நாசா தெரிவித்துள்ளது.

நிலவை சுற்றிவரும் நாசாவின் ஆர்பிட்டர், இன்று விக்ரம் லேண்டர் தரையிறங்கிய பகுதியை கடக்க உள்ளதாகவும், அப்போது அதை புகைப்படம் எடுத்து, இஸ்ரோவுடன் அதனை பகிர்ந்து கொள்ளும் எனவும் நாசா தெரிவித்துள்ளது.