கேரளாவில் கனமழை, வெள்ளம் மற்றும் நிலச்சரிவுகளில் சிக்கி உயிரிழந்தோர் எண்ணிக்கை 115 ஆக அதிகரித்துள்ளது.

கேரளா மாநிலத்தில் கடந்த ஒரு வாரத்துக்கும் மேலாக கனமழை பெய்து வருகிறது. கனமழை காரணமாக இடுக்கி, வயநாடு, மலப்புரம் உள்ளிட்ட 8 மாவட்டங்களில் வெள்ளப்பெருக்கு மற்றும் நிலச்சரிவுகள் ஏற்பட்டன. வெள்ளப்பெருக்குகளில் ஆயிரக்கணக்கான மக்கள் சிக்கி தவித்து வந்தனர். வெள்ளத்தில் சிக்கியவர்களை மீட்கும் பணிகள் தொடர்ந்து தீவிரமாக நடைபெற்று வருகின்றன. இதுவரை சுமார் ஒன்றரை லட்சம் மக்கள் மீட்கப்பட்டு நிவாரண முகாம்களில் தங்க வைக்கப்பட்டுள்ளனர். நிலச்சரிவுகளில் சிக்கி மாயமானவர்களை தேடும் பணி முடுக்கி விடப்பட்டுள்ளது. இந்த நிலையில், கேரளா கனமழை, வெள்ளம், நிலச்சரிவுகளில் சிக்கி உயிரிழந்தோர் எண்ணிக்கை 115 ஆக உயர்ந்துள்ளது. அதிகபட்சமாக, மலப்புரம் மாவட்டத்தில் 48 பேர் உயிரிழந்துள்ளனர். மேலும், பலர் நிலச்சரிவுகளில் சிக்கி இருக்கலாம் என தகவல் வெளியாகியுள்ளது.