பெற்றோர் அடிக்கடி சண்டைபோட்டுக்கொள்வதால் மனமுடைந்த சிறுவன் ஒருவன், தனது உயிரை மாய்த்துக்கொள்ள அனுமதி கேட்டு குடியரசுத் தலைவருக்கு கடிதம் எழுதிய சம்பவம் அதிர்ச்சியை ஏற்படுத்தியுள்ளது.

குடியரசுத்தலைவர் திரு. ராம்நாத் கோவிந்துக்கு, சிறுவன் எழுதிய கடிதத்தில், தான் பீஹார் மாநிலத்தை சேர்ந்தவர் எனவும், தனது தந்தை அண்மையில் இடமாற்றம் செய்யப்பட்டு, ஜார்க்கண்ட் மாநிலத்தில், மாநில ஊரக வளர்ச்சி துறையில் பணியாற்றுகிறார் என்றும், தாய், பீஹாரில் வங்கி அதிகாரியாக பணியாற்றி வருவதாகவும் தெரிவித்துள்ளார். தற்போது தான் தந்தையுடன் வசித்து வரும் நிலையில், தனது பெற்றோர் அடிக்கடி சண்டையிட்டுக்கொள்வதால் மிகுந்த மனவேதனை அடைவதாகவும், புற்றுநோயால் பாதிக்கப்பட்டுள்ள தனது தந்தையை, தாய், ரவுடிகளை வைத்து மிரட்டுகிறார் எனவும் குறிப்பிட்டுள்ளார். இதுபோன்ற நிகழ்வுகளால் மனதளவில் பாதிக்கப்பட்டுள்ள தான், தனது உயிரை மாய்த்துக்கொள்ள அனுமதி அளிக்க வேண்டும் என கடிதத்தில் உருக்‍கத்துடன் குறிப்பிட்டுள்ளார்.

இந்த கடிதம், பிரதமர் அலுவலகத்தின் கவனத்துக்கு கொண்டுசெல்லப்பட்டதைத் தொடர்ந்து, இந்த விவகாரம் குறித்து, உடனடியாக நடவடிக்கை எடுக்குமாறு, பீஹார் மாநில நிர்வாகத்துக்கு, பிரதமர் அலுவலகம் உத்தரவிட்டுள்ளது.