பீகார் மாநிலத்தில் மூளைக்‍காய்ச்சலால் உயிரிழந்தவர்களின் எண்ணிக்கை 128-ஆக உயர்ந்துள்ளது.

பீகார் மாநிலம் முசாபர்பூரில் மூளை காய்ச்சல் நோய் குழந்தைகளிடையே வேகமாகப் பரவி வருகிறது. கடந்த ஜனவரியில் பரவ தொடங்கிய இந்நோய் கோடை காலத்தில் அதிக பாதிப்பினை ஏற்படுத்தியுள்ளது. கடந்த மாதத்தில் 11 பேர் வரை இந்நோய் தாக்‍குதலால் உயிரிழந்தனர். இந்த எண்ணிக்கை தொடர்ந்து உயர்ந்து கடந்த சில நாட்களுக்கு முன் 41-ஆக உயர்ந்தது. அதன்பிறகு முசாபர்பூர் மாவட்டத்தில் மேலும் 2 குழந்தைகள் உயிரிழந்தனர்.

பீகாரின் முசாபர்பூர், கயா ஆகிய மாவட்டங்களில் நோய் தாக்கம் அதிக அளவில் உள்ளது. சாபர்பூர் பகுதியில் Acute Encephalitis Syndrome மூளைக்காய்ச்சலும், கயா பகுதியில் Japan Encephalitis மூளைக்காய்ச்சலும் பரவியுள்ளது. நோய் பாதிக்கப்பட்டு மருத்துவமனையில் அனுமதிக்கப்பட்ட பலரது நிலைமை கவலைக்கிடமாக உள்ளது. இந்நிலையில், முசாபர்பூரில் மூளை காய்ச்சலால் உயிரிழந்தோர் எண்ணிக்கை 128-ஆக உயர்ந்துள்ளது. இந்த காய்ச்சல் கயா மாவட்டத்துக்கும் பரவியுள்ளது. இந்த காய்ச்சல் பாதிப்பு அறிகுறியுடன் இருக்கும் 130 குழந்தைகளுக்கு தீவிர சிகிச்சை அளிக்கப்பட்டு வருகிறது.