சபரிமலை விவகாரத்தில் பிரதமர் திரு. மோடி இரட்டை வேடம் போடுவதாகவும், சபரிமலையை கலவர பூமியாக்‍க பா.ஜ.க. திட்டமிட்டதாகவும், கேரள முதலமைச்சர் திரு. பினராய் விஜயன் குற்றம்சாட்டியுள்ளார்.

சபரிமலையில் அனைத்து வயது பெண்களையும் அனுமதிக்‍க உச்சநீதிமன்றம் உத்தரவிட்டபோது, அங்கு ஏற்பட்ட பதற்றத்தை தணிக்‍க, 144 தடை உத்தரவு பிறப்பிக்க வேண்டும் என்று பா.ஜ.க.தான் கூறியதாக திரு. பினராயி விஜயன் தெரிவித்துள்ளார். சபரிமலையை கலவர பூமியாக்‍க மத்திய மோடி​அரசு திட்டமிட்டதாகவும், கடும் நடவடிக்கைகள் மூலம் அந்த முயற்சி தடுக்‍கப்பட்டதாகவும் பினராயி குறிப்பிட்டார்.

சபரிமலையை பாதுகாக்கவேண்டும் என்பதுதான் கேரள அரசின் கொள்கை என தெரிவித்த அவர், கேரளா வந்தபோது சபரிமலை குறித்து பேசாத பிரதமர் மோடி, கர்நாடக மாநிலம் மங்களூரில் பேசும்போது சபரிமலையையும், ஐயப்பனையும் குறிப்பிட்டு பேசியதாக குற்றம் சாட்டினார். கேரளாவில் சபரிமலை என்று பேசினாலே அம்மாநில அரசு கைது செய்கிறது என்று பொய் குற்றச்சாட்டை மோடி கூறியதாகவும், இது கேரளாவை அவமானப்படுத்தும் செயல் என்றும், பினராயி விஜயன் கண்டனம் தெரிவித்தார்.