ஐ.எஸ். பயங்கரவாத அமைப்புக்கு ஆயுதங்களை சப்ளை செய்ததாக கைது செய்யப்பட்ட இளைஞரை 10 நாட்கள் காவலில் எடுத்து விசாரிக்க தேசிய புலனாய்வு அமைப்புக்கு டெல்லி உயர்நீதிமன்றம் உத்தரவிட்டது.

வடஇந்தியாவில் 'ஹர்கத் உல் ஹர்ப் இ இஸ்லாம்' என்ற புதிய பயங்கரவாத அமைப்பு செயல்பட்டு வருவதாக தேசிய புலனாய்வு அமைப்புக்கு தகவல் கிடைத்தது. சிரியா மற்றும் ஈராக்கில் செயல்பட்டு வரும் ஐ.எஸ். பயங்கரவாத இயக்கத்தால் கவரப்பட்ட அதன் ஆதரவாளர்கள் இந்த அமைப்பை தொடங்கி உள்ளனர். இதனையடுத்து டெல்லி மற்றும் உத்தரபிரதேசத்தில் அதிரடி சோதனையை நடத்திய தேசிய புலனாய்வு பிரிவு 10 பேரை கைது செய்தது. டெல்லியில் குண்டு வெடிப்புகளை நிகழ்த்துவதற்கு இந்த இயக்கத்தினர் சதித்திட்டம் தீட்டி இருப்பதும் தெரியவந்தது. இந்த பயங்கரவாத அமைப்புக்கு ஆயுதங்களை சப்ளை செய்ததாக நாயிம் என்ற இளைஞர் கைது செய்யப்பட்டார். இதையடுத்து அந்த இளைஞர் டெல்லி உயர்நீதிமன்றத்தில் ஆஜர்படுத்தப்பட்டார். இந்த வழக்கை விசாரித்த நீதிபதி, அந்த இளைஞரை 10 நாட்களுக்கு காவலில் எடுத்து விசாரிக்க தேசிய புலனாய்வு அமைப்புக்கு உத்தரவிட்டார்.