புதுச்சேரியில் நிதி நிறுவன ஊழியரிடம் 5 லட்சம் ரூபாய் வழிப்பறியில் ஈடுபட்ட சிசிடிவி காட்சிகள் வெளியாகியுள்ளன.

காஞ்சிபுரம் மாவட்டம், மதுராந்தகத்தைச் சேர்ந்த வெங்கடேஸ்வரா பைனான்ஸ் நிறுவனம் செயல்படுகிறது. இதன் கலெக்‍ஷன் ஏஜெண்டாக பணிபுரியும் பாலசுப்பிரமணியம், புதுச்சேரியில் உள்ள பல்வேறு நிறுவனங்களுக்கு கடனாகக் கொடுத்த தொகைக்கு மாதந்தோறும் வட்டி வசூல் செய்து வருகிறார். அப்படி நேற்று வசூலித்த தொகையை எடுத்து வரும் போது, ஒருவர் கத்தியை காட்டி மிரட்டி அடித்து உதைத்து பணப்பையை பறித்துச் சென்றுள்ளார். இதுகுறித்து ரெட்டியார்பாளையம் காவல் நிலையத்தில் பாலசுப்பிரமணியன் அளித்த புகாரின் அடிப்படையில், அங்குள்ள கண்காணிப்பு கேமராக்களை போலீசார் சோதனையிட்டனர். இதில் ஒரு கேமராவில் பாலசுப்பிரமணியத்தை ஒருவர் கத்தியை காட்டி மிரட்டி பணம் பறிப்பது பதிவாகியிருந்தது. இதனடிப்படையில் சந்தேகத்தின் பேரில் 4 பேரை பிடித்து போலீசார் தீவிர விசாரணை நடத்தி வருகின்றனர்.