கொல்கத்தாவில் ரயில்வே அலுவலக கட்டிடத்தில் ஏற்பட்ட தீ விபத்து குறித்து, 4 பேர் கொண்ட குழு சார்பில் உயர்மட்ட விசாரணைக்கு உத்தரவிட்டப்பட்டுள்ளது.

மேற்கு வங்காளத்தின் கொல்கத்தா நகரில் ஸ்டிராண்ட் சாலையில் உள்ள 13 மாடிகள் கொண்ட கட்டிடத்தில் நேற்று இரவு திடீரென தீ விபத்து ஏற்பட்டது. தகவலின்பேரில் 8 தீயணைப்பு வாகனங்களுடன் சம்பவ பகுதிக்கு வந்த தீயணைப்பு வீரர்கள், தீயை அணைக்கும் பணியில் தீவிரமுடன் ஈடுபட்டனர். இந்த விபத்தில் சிக்கி 9 பேர் பரிதாபமாக இறந்தனர். இவர்களில் 4 தீயணைப்பு வீரர்களும், துணை காவல் ஆய்வாளர் ஒருவரும், ரயில்வே ஊழியர்கள் இருவரும் அடங்குவர்.

இந்நிலையில், இந்த விபத்து குறித்து மத்திய ரயில்வே அமைச்சர் திரு. பியூஷ் கோயல் தனது டுவிட்டர் பக்கத்தில் வெளியிட்டுள்ள அறிவிப்பில், மாநில அரசுடன் மீட்பு, நிவாரணப் பணியில் இணைந்து பணியாற்ற தயாராக உள்ளதாக குறிப்பிட்டுள்ளார். ரயில்வே வாரியத்தின் 4 முக்கிய தலைமை அதிகாரிகள் அடங்கிய குழு சார்பில், தீ விபத்து குறித்து உயர்மட்ட விசாரணைக்கு உத்தரவிடப்பட்டுள்ளதாகவும் திரு. பியூஷ் கோயல் தெரிவித்துள்ளார்.