தெலங்கானா மாநிலத்தில் பயின்று வரும் ஆந்திர மாநில மாணவர்களுக்கு கல்வி உதவித் தொகை வழங்கப்பட மாட்டாது என முதலமைச்சர் சந்திரசேகர ராவ் தெரிவித்துள்ளதால், பரபரப்பு ஏற்பட்டுள்ளது.

1956-ம் ஆண்டிற்கு முன்பிருந்து தெலங்கானாவை பூர்வீகமாகக் கொண்ட மாணவர்கள் கல்வி பயின்று வந்தால் அவர்களுக்கான கல்வி உதவித் தொகை தொடர்ந்து வழங்கப்படும் என்றும், ஆந்திராவில் இருந்து தெலங்கானாவில் உயர் கல்வி பயின்று வரும் ஆந்திர மாணவர்களுக்கான கல்வி உதவித் தொகை நிறுத்தப்படும் என்றும் தெலங்கானா மாநில முதலமைச்சர் திரு. சந்திரசேகர ராவ் தெரிவித்துள்ளார். இதற்காக இயற்றப்படவுள்ள சட்டம், அடுத்த 10 ஆண்டுகள் வரையில் அமலில் இருக்கும்படியாக நடவடிக்கைகள் மேற்கொள்ளப்படும் என்றும் குறிப்பிட்டுள்ளார். தெலங்கானா மாநில முதலமைச்சர் திரு. சந்திரசேகர ராவ்வின் அறிவிப்பால், தெலங்கானா பகுதியில் உயர் கல்வி பயின்று வரும் ஆந்திர மாணவர்கள், தங்களது கல்வி பாதிக்கப்படும் என்ற அச்சத்தில் உள்ளனர்.